GEGURITAN

ASMARANE GURU IPA 

Mbobok pagere ati nganggo pesawat sederhana,

Bisa mlebu bleng kanthi kekuatan Newton,
Kecemplung ing tlagane asmara , nyilem kadya Archimedes,
Lelumban banyu bening kang nelesi naluriku merga daya kapilaritas.
Dayane rasa kang nyetrum luwih gedhe tinimbang daya arus listrik,
Pancen ana sing ngalangi, gumantung pirang Ohm sing dikarepake,
Asmaraku dakpasang kanthi seri,
Dudu paralel sing kapilah-pilah.
Ing angkasa ana planet, lintang lan rembulan,
Sebab ati iki umpama Astronomi,
Wis kagelar nurut orbit sing kudu diliwati,
Orbitku tumuju marang sliramu, pancen sliramu kuwi satelitku.
Saiki rembugan babagan tetanduran,
Winih ing ati dakdhedher kanthi kultur jaringan,
Ngrembaka daktandur ing polibag njero dhadha,
Yen wis kembang lan awoh disinau nganggo hokum Mendel.
Asmarane guru IPA,
Ora mung mandheg kebak teori-teori,
Kudu ndang dipraktekake,
Supaya kagayuh kabeh kompetensine.

(Kr Agus Junaedi)